Быдэ вуонлэн пужыосыз

 

Мувыр-Вишур гуртысь егитъёс визитказэс возьмато

Шаркан ёросысь Мувыр-Вишур клуб быдэ вуонлы сӥзем «ЭРУ» шулдыръяськонэз 3-тӥзэ ортчытӥз. Та гуртысь егитъёслэн командазы 2 пол вормылӥз ни, оло, удалтоз туэ но?

Мувыр-Вишуре вуимы но, соку ик мылкыдмы ӝутскиз: быдэс арня зоръёс кисьтэм бере шунды быдэс нунал пиштӥз. Мукет сямен луыны но уг быгаты – та «Шунды» огазеяськонлэн ужрадэз ук. Ми, огазеяськонлэн ёзчиосыз, нырысетӥосыз пӧлын вуимы. Берпуметӥ дасяськонъёс, шулдыр кырӟанъёс, ӝоген вуозы соос – ёросъёсысь 14-18 аресъем егитъёслэн командаоссы.

 

Толон гинэ кадь ачим соос быдӟа вал, нош туннэ жюриын пукисько. Вӧзам удмуртиысь дано кылбурчи Владимир Котков. Солэн «Шаркан палан» кылбур бичетэзъя ик командаослы квест-игра дасямын вал – туала егитъёс котыр ласянь азинлыкоесь луыны кулэ.

Тани соос сцена вылын – йӧноесь, кужмоесь, задоресь! Шаркан, Вавож, Эгра, Кияса ёросъёсысь, Татарстанысь Агрыз, балтач ёросъёсысь 7 удмурт команда люкаськиз. Нош паймытӥз 8-тӥез команда – финнъёс. Арлы быдэ Финляндиысь туристъёс Шаркан палъёсы гужемзэс ортчыны вуыло, таӵе шулдыръяськон сярысь кылыса, соос но мылкыд кариллям пыриськыны. Бен, туссыя таос быдэ вуисьёслэсь висъясько: мыйыкоесь, огезлэн-кыкезлэн йырсизы но пурысьтамын ни, но мылкыдзыя котьку егитэсь.

Финляндиысь арлыдоослэн командазы

«ЭРУ» гуртын улӥсьёслы но пайда ваиз. «Ми татын вал» арт-проект чотын пулэсь 8 ӟусъёсты буяно вал. Егитъёс тыршизы отчы асьсэлэсь аспӧртэм туссэс кельтыны: кинъёс ке ки пытьыоссэс суредазы, мукетъёсыз нимъёссэс гожъязы, куинетӥосыз гуртсэс данъязы. Вань та ужъёсты герӟаз удмурт шӧм: пужыос, пусъёс, буёлъёс. Оскиськом, та ӟусъёс вишуръёсты кема шумпоттозы на.

Мукетыз этап – «Кык дыдыкъёс» ӵошатскон. Котькуд командаысь одӥг ныл но одӥг пи пыриськизы. Таоссэ зол эскерыны малпаллям! Быгатӥськод-а тӥ карнанэн ву нуллыны? Пу вандыны? Сое пильылыны? Кирпичлэсь сэрег пуктыны? Нош соос быгато! Адӟе вал финнъёслэсь синъёссэс: соослэн таӵе ужен улонытозязы выремзы ӧвӧл, нош асьме егитъёс кизэс ӝуто гинэ – пуклёк пилемын ни. Финнъёсты конкурслы гурт калык дасяз ке но, та соослы ӧз юртты. Котыр ласянь асьсэды ӟечен возьматӥзы Светлана Ерёмина (Шаркан ёросысь Кыква гурт) но Игорь Иванов (Вавож ёросысь Гурезь-Пудга гурт). Соос ик вормизы.

Кияса ёросысь Татьяна Касаткиналэн ӵошатсконъёс бере мылкыдыз умой кылиз:

– Зэмзэ вераса, мон кожасько вал, татын ваньмыз нылпиослы кадь луоз: пичи ведраос, шудон карнан, шудон тӥр. Но со озьы вылымтэ. Ваньмыз рос-прос. Таӵеезлы дась ӧй вал. Черсиськон но каньыл ӧй вал. Кубо сьӧры «Эру» азьын нырысьсэ пуксьылӥ.

Малпасько, тросэз учкисьёс паймизы егитъёслэн быгатонлыкъёссылы. Ма, мон ачим но, дыр, шурысь карнанэн вуэз кисьтатэк ӧй тубытысал. Ваньзылы сюлмысь чабимы. Но вань этапъёсты лыдэ басьтыса, Шаркан ёросысь Нижние Кивары муниципал кылдэтысь команда вормиз. 2-тӥ инты басьтӥзы мувыр-Вишуръёс, 3-тӥ – Эгра ёросысь кабачигуртъёс.

Быдэ вуисьёслы сяна, «ЭРУ» пересьёслы но шумпотон вае. Гуртысь песянайёс ужрадэз мылысь-кыдысь учкизы, нылпиосынызы данъяськыса пукизы.  21-тӥ даурын ке но улӥськомы, калыкмылэн сям йылолъёсыз улэпесь. Соосты утён – ужрадлэн валтӥсь ужпумез.

Мария Емельянова 

Туспуктӥз Максим Агафонов

“Удмурт дунне” газетлэн “Герд” приложениез 57-тӥ номер

Leave a Reply

Your email address will not be published. Required fields are marked *