Герман Волков: “Лу котьку пинал!”

                                                                                                                                                                  «Котьку мед пиштоз Шунды!» – таӵе девизэн трос ар ӵоже улэ ини удмурт егитъёслэн «Шунды» огазеяськонзы. Воштӥсько кивалтӥсьёс, воштӥське правление. Правление шедё тужгес но зол азьмуртъёс… Соос пӧлы  сюриз Герман Волков но. Удмурт пияш вордӥськемын Пичи-Пурга ёросын, Пуро гуртын. Улон девизэз – «Лу котьку пинал!»

 

 

– Нырысь ик  юан кылдэ, Герман, мар тон понна «Шунды»?

– «Шунды» – со мон понна кыӵе ке остров, кытын адямиез шуныт пумитало, гажало, юртто тыныд усьтӥськыны но азьлань вамышъёс лэсьтыны. Организациен тодматски, ку дышетсконме быдтӥ Кузебай Герд нимо гимназиын. Мон каллен-каллен кутски пыриськыны «Шунды» огазеяськонлэн проектъёсаз, али дырлы  мон ачим но юрттӥсько лэсьтыны со проектъёсты, но луисько правленилэн ёзчиез. Мынам туж зол потэ вал ужаме «Шундыын», мынам потэ вал возьматэме асме, малы ке шуоно потӥз азьланьтэме удмурт лулчеберет ӝутон ужез.

– Маиныз тонэ возе «Шунды», кыӵе проектъёсыныз тон тужгес но тунсыкъяськиськод?

– Лэсьтэм ужрадъёс туж кельшо, тросэзлы со мероприятиосын дышисько, трос выльзэ басьтӥсько – визь, азинскон, астэ усьтон. Али дырлы огазеяськонлэн туж трос малпанъёсыз но проектъёсыз, кудъёсыз сӥземын школаын дышетскисьёслы, студентъёслы, егит семьяослы… Мынам шӧдэмея, огазеяськон туж зол ужа, весяк мар ке но выльзэ малпа, мар ке но лэсьтэ. Мыным кельше «Шуд.com» проект, малы ке шуоно шудыса адями возьматэ зэмос ассэ. Озьы ик «Шундыкар» лагерез туж яратӥсько. Со котькуд ар вошьяське. Котьку выль кизилиос отын усьтӥсько.

– Маин тон тусыкъяськиськод «Шунды» огазеяськонэн сяна?

– Мон дышетскисько Удмурт кун университетын, социальной коммуникациосъя институтын, культурология ёзэтын. Озьы ик ваньмон дыръя кылбур гожъясько, рэп лыдӟисько, видеоужъёсын тунсыкъяськисько. Яратӥсько удмурт эктонъёсты быдэсъяны, УдГУ-ын «Старая гвардия» КВН командаын шудӥсько. Озьы ик мон ужасько на KFCиын.

Мон вунэтӥ, кытын шурлэн бызем куара

Вылтырме шулдыреныз кынтылӥз…

Мон уг адӟы ни, кызьы мӧзмыт учкиз шорам

Бадьпу, но берпум куаръёссэ уськытӥз…

Мон уг шӧды мур омырез шокчыку,

Бер сӥзьыллэсь кужмо йырпоронзэ,

Мон, нылъёс, тодӥсько вал куке но соку,

Ӟардон сиос азьын кызлэсь ушъяськемзэ…

Мон улӥ котькуд тӧл пельтэмлы шумпотыса,

Шумпотыса котькуд зор шапыклы…

Котькуд возьёс вылтӥ бубли сьӧры бызьса,

Мон дась вал сураськын инкуазь пӧлы.

Лулы дырекъятозь но синвуос поттозь,

Мон ӟыгырьяй сӥзьыл акшан вакытъёсты.

Али нош шумпоттэк. Огнам. Сюлмын но вӧсь…

Уг валаськы ини инкуазь лек кылъёсты…

(Герман Волков)

– Мар сӥзьысал «Шундылы»?

– Шундылы сӥзисько чырткем но пиштӥсь выль пиналъёсты.

– Туж бадӟым тау тыныд, Герман. Одно ик музъем вылэ лёгиськид ке – мед кылез пытьыед! Ваньмыз мед удалтоз!

Ирина АГЕЕВА

Leave a Reply

Your email address will not be published. Required fields are marked *